Historia Badak: Diferente Lingua

Tempo neba iha Tia ida husi Baucau (Makasa'e) nia hola mane ema Covalima (Tetun Terik), sira moris hamutuk hanesan Fen Laen tinan barak ona no iha oan nain 2 (Feto ida no mane ida)
Durante tinan barak sira hola malu, Tia ne'e sedauk bele komprende liafuan barak husi dialetu Tetun Terik nian, tamba bainhia sira koalia hamutuk sempre mosu perguntas barak husi Tia ba nia Laen no mos Nia banin tamba deit dialetu Tetun Terik balun diferente ho Tetun Prasa (Dili).

Tamba deit diferente dialetu ne'e mak akontese ka mosu historia hanesan tuir mai ne'e:
Banin Feto            : Uma Nain (Feto Foun)=dialetu Tetun Terik ba Feto Foun, o ba to'os karik orsida fila mai uma keta haluha lori modo lekirauk ba modo orsida kalan nian.
Tia                            : ho konfuzaun hatan" Diak Ama"

Bainhira to'o ona ia to'os, hafoin hamos du'ut iha batar sira no besik ona oras atu fila ba uma, Tia ne'e hanoin kona saida mak Banin Feto hameno ba nia katak keta haluha lori modo lekirauk. Tia ne'e komesa ona hateke tun sae iha ai hun bo'ot sira nebe besik to'os ninin no hafuhu iha Lekirauk ruma mak tur iha ai hirak ne'e karik, tamba durante ne'e bainhira batar besik ona atu koelheta lekirauk sempre ba han.

Iha momento ne'e Tia hetan duni lekirauk lubuk ida mak haksoit ba mai iha ai, Nia foti kedas Fiska hodi tiru maibe lekirauk haksoit ba mai, halo Tia mos to'o tensaun sa'e no hasai liafuan "ahhhhhhhh....ohin kalan han maran tesik neba, nusa mak tenke haruka hau tenke buka fali modo lekirauk ida be isin moris haksoit ba mai hanesan ne'e. Hakarak han naan nusa la hatete lolos para ba hola deit naan iha merkado neba, ba kastigo fali hau ida hanesan ne'e.n Ikus mai ho nervoju Tia ne'e fila ba uma tamba nakukun ona.
Bainhira to'o uma, hafoin deskansa uituan, Banin Feto husu:

Banin Feto                 : Uma Nain, lori modo lekirauk kalae?

Tia                                  : Ama, hau la toman ida tamba lekirauk iha ai leten neba hau iha ai hun halo nusa mak hau bele kaer toman. hau uja fiska tiru mos nunka ida atu monu mai (hatan ho oin manas uituan)

Banin Feto               : haiiiiii....Uma Nain se mak haruka Uma Nain ba duni tuir fali lekirauk iha ai leten ne'e

Tia                            : Ama toh........ohin antes atu ba to'os Ama hameno dehan fila lori modo lekirauk, ne'e mak hau ba duni lekirauk iha ai leten ne toh
Banin Feto            : Jesus Kristo........Uma Nain, ami nia lian Modo Lekirauk ne'e mak bain-bain ema Dili sira bolu naran "Angiraun". Ami Terik nia lian mak bolu Lekirauk ne'e maibe laos lekirauk ai leten. Ida lekirauk ai leten ne'e ami bolu dehan "Karawa"

Tia                        : huffffffffff.........tensaun sae to'o 400, atu mate sae deit ona. Nusa ama la hatete antes modo angiraun kedas, hau hamos du'ut kolen tia ba duni tan fali lekirauk iha ai leten. Afinal Modo Lekirauk ne''e mak Angiraun ne'e. 

Posaaaaaaaaaaaaaaaaaaaaaaaaaaa..........................Sakit kalae kuandu dialetu diferente ikus mai sira iha uma laran iha kalan ne'e tenke han maran, maske han maran maibe sira kontente tamba hare malu hamnasa tamba deit historia oan ne'e, hakfodak han hotu no ida-idak ba deskansa.

Adeus...........................

Hakerek Husi 

Cha DJ

Salele, 19 Julhu 2021